Kabylie Tamazight

At Smaεel: iɣleb ucerrig tafawet

Ecrit par Hichem B

Taɣiwant n At Smaɛel d taɣiwant ara inṭṭerren s usyax n ubrid yeqqnen gar-s akked tɣiwant n Taskriout. Deg usmekti ugar n 4 n yiseggasen teḍra-d tedyant yecban-a, twalam anata tamnaḍt inṭṭerren, lehlak ad iqaz aṭas imezdaɣ n tɣiwant n At Smaεel akked yimezdaɣ n snat n tuddar Aneqquc akked Rrif.

Taluft-a n usyax teḍra-d deg useggas 2015, ɣas akken yella-d uqeεεed n ubrid maca aya ur d-yegli ara s tifrart n wugur, imi yal tagrest tettuɣal-d taluft-a n ucerreg n ubrid. D lawan ad d-tili tifrart n wugur-a akken iwata lḥal uqbel ad ifat lawan imi d imezdaɣ n taɣiwant n At Smaεel akked snat n tuddar n tɣiwant n Taskeriout ara inṭerren nezzeh s usyax-a ma yella ur d-tegri ara tsuddut lecɣal n baylek ad d-afen tifrart iwulmen i wugur-a mačči d taxeyyaṭ n yicerrigen. Hata twalam igemmaḍ n lecɣal ur nemmug ara akken iwata lḥal. Abrid-a yesεa azal meqqer deg tudert n yimezdaɣ imi yeqqen daɣen akked kra n tuddar n lwilaya n Sṭif am Buyman, Tizi n Lexmis akked tiyaḍ. Yal ass yettzid ucerreg n ubrid. Imezdaɣ ttnadin tifrart yelhan i wugur-a.

Tadyant-a tella-d s tmental n waman wid yettazalen ddaw n tmurt, d tadyan i         d-yeǧǧan lǧerrat d ccwami, mačči kkan deg wallaɣ n yimezdaɣ n temnaḍin-a, yekcem uḥeyyir, d uxemmem amek ara tefru taluft ? imi ur d-iban ara yixef-is; ɣas akken, yella-d unekcum n yiεeggalen n useqqamu aɣerfan n snat n tɣiwanin-a «  At Smaεel akked Taskeryut »; anekcum-a yella-d s wallalen n uqaεed n yiberdan, iwakken ad xiṭen acerreg n ubrid, maca « yeɣleb ucerrig tafawet ». Tadyant-a, tebda-d deg useggas 2015, maca yella-d kra n ustehzi sɣur yiεeggalen n tenmehla n lecɣal n lbaylek « D.T.P » n Xerraṭa, ɣas akken εerḍen ad qaεden kra deg-s, uɣalen qqimen lecɣal d azgen, neɣ d ayen i sekfan deg usenfar-a. Abrid-a d win yeqqnen gar Bgayet d Sṭif seg tlisa n tɣiwant n At Smaεel. Uṭṭun-s 06 ( C.W 06). Ɣas akken  yella-d yella-d unekcum s temɣawla n yiεeggalen n useqqamu aɣerfan n tɣiwant n Taskeryut, akked tin n At Smaεel akked yiεeggalen n D. T. P n Xerraṭa. Maca ayen ad as-rnan neɣ ad as-ssan d akal i umdun-a yugi ad iqeεεed; amkan-a mazal iḥedder kkan. Taluft ur teḥbis ara kkan da, maca abrid yettwaɣ merra. Abrid-a yebḍa ɣef yiḥricen. Yuɣal ubrid d tiseddarin d  timducin war aman.

Imezdaɣ n temnaḍin-a « Aneqquc, Rrif »  akked  tɣiwant n At Smaεel nṭṭerren s twaɣit-a, imi ẓẓran d akken d  taεkumt ẓẓayen ɣef tuyat, imi tifrart-is ur tban ara, ar tura.

Nacer AKOUCHE

 

 

 

 

A propos de l'auteur

Hichem B