Tamazight

Awal akked Ɛezzun Ḥmed : Isufa n tlelli d aya i nessaram

Ecrit par Hichem B

Dda Ḥmed Ɛezzun, nessen-it ɣef usayes deg tfaskiwin n tmedyezt yimxalafen akked leqdicat n waṭas n tdukkliwin ama deg taddart-is neɣ berra i temnaḍt-is, daɣen nesla-s deg yiḍebsiyen, meεna tikkelt-a yeḍfer adrid-nniḍen, d brid yettɣiman i lebda, wa d abrid n tira. Ammud-a n tmedyezt yeddmen azwel        “ Isufa n tlelli ”, d azwel yellan lqayen am tmedyezt-is.   Deg wammud-a ad d-tafem deg-s 81 n yisebtar, ttwarun deg-sen 37 n yisefra.

Awal ɣef mass Ɛezzun Ḥmed: d amedyaz seg tɣiwant n At Smaεel, ilul ass n 28 deg yunyu 1970 deg taddart n At Idris, isimed tudert-is akked leqraya-s deg taddart Krun, yekcem annar n tẓuri asmi yella d anelmad deg uɣerbaz alemmas. Ḥmed yekki deg waṭas n tceqqufin n umezgun am wakken yella daɣen icennu deg yisefra n taḍsa. Asmi yesεa 19 n yiseggasen yesruḥ tamuɣli. Maca ur yekni ara i ṭṭlam i d-yeɣlin ɣef wallen-is ikemmel deg ubrid n tẓuri d tmedyezt ar ass-a.

Ilmend n usuffeɣ n usenfar-a, tettunefk-as tegnit i uɣmis Tiɣremt iwakken ad yaẓ ɣur-s iwakken ad d-yerr ɣef kra n yisteqsiyen. Ihi qqimet yid-neɣ.

Azul fell-ak a gma Ḥmed, yid-k aɣmis Tiɣremt. Amek yettili umedyaz-nneɣ ?

Ɛezzun Ḥmed: Azul fell-awen, ansuf s uɣmis n tmaziɣt “ Tiɣremt” tanemmirt-nwen imi tcerkem yid-i lferḥ n usenfar-a. ta d tagnit iwakken ad temlil tsuta d tayeḍ, d acu ara ak-d-iniɣ aqlin labas.

Ɛezzun Ḥmed d tigejdit gar tgejda n tmedyezt taqbaylit. Amek alammi tuɣaleḍ d aḥeddad  n wawal ?

Mačči d nekk i yebɣan ad uɣaleɣ d amedyaz. Maca seg temẓi-w ttḥessiseɣ i yinaẓuren imeqqranen am Sliman Σazem, Ṭaleb Rabeḥ, Ccix Nurdin, d wiyaḍ imi inaẓuren-a ttagmen-d tamedyezt-nsen seg tmetti, acku timetti n Leqbayel d agruj ur nfennu. Ma yella d nekk xeddmeɣ tamedyezt akken ad tt-id-yenna wul-iw, deg laεmer ur tt-xdimeɣ iwakken ad εejbeɣ i medden, xeddmeɣ-tt kan iwakken ad d-iniɣ ayen iyi-qerḥen d wayen iyi-sferḥen, d ayen ttwaliɣ s wul-iw deg tmetti-nneɣ, d wayen ttḥulfuɣ, ahat d aya i yessawḍen lɣaci ad d-ḥemmlen ad slen i tamedyezt-iw.

Tewwiḍ  arraz amezwaru deg tfaska n Sumam tiẓrigt tis mraw. Amek tettwaliḍ tamedyezt taqbaylit ass-a ?

Uqbel ad meslayeɣ ɣef tmedyezt ɣur-i ad meslayeɣ ɣef tmedyezt s umata: Tamezwarut d tawsit gar tewsatin n teskla, tis snat yes-s i tedder tutlayt akken neẓra, idles-nneɣ yebna ɣef timawit dayen i yeǧǧan tutlat-nneɣ ad tidir. Ihi tamedyezt ɣur-s taẓayt deg tmetti imi timetti-nneɣ d tin yesseqdacen awal s tuget. Ma yella d tamedyezt taqbaylit ass-a tuɣ abrid ussnan ama deg yisental, llan deɣen wiyaḍ snulfuyun-d talɣiwin-nniḍen, llan wid i εerḍen ad d-yewwin ssenf-nniḍen n tmedyezt, aya yerna-d ɣer tɣentert n tmedyezt taqbaylit. Ma yella d iswi nesεiɣ nekk, bɣiɣ ad snerniɣ, ad smehzeɣ tmedyezt taqbaylit, ad tecbu tid n ddunit merra, yerna ad tufrar.

 

Tamedyezt-ik d tin yellan lqayen yerna tecbeḥ s waṭas. D acu d sser seg waya?

Nekk seg tazwara, neɣ ma yehwa-yak seg temẓi-w ḥemmleɣ tamedyezt taqbaylit taqburt am tin Si Muḥ U Mḥend, Si Lbacir Amellaḥ, Yusef U Qasi d wiyaḍ, imi tamedyezt-nsen tecbeḥ s waṭas acku ttagmen-d imeslayen seg tmetti, ɣas akken isental ɣef wacu i d-ttawin mgaraden. Maca tamedyezt-nsen azal-is meqqrit, ɣef waya i ḍefreɣ abrid-a n tmedyezt ɣas akken tura nemgarad deg tira n usefru yal yiwen amek ad t-yettaru, imi ayen ɣef wacu ttarun medden yemgarad, yal wa amek yettwali tignatin yellan deg tmetti, lameεna ssenf n tmedyezt akked ssenf n yisefra d yimeslayen kifkif, nekk ttwaliɣ tamedyezt taqbalit d lsas n tmetti, imi d agerruj ur nfennu.

Tebdiḍ tettaruḍ isefra seg zik, yerna turiḍ aṭas deg-s, deg yal tamsalt, maca mi ara yebɣu yiwen ad yexdem tasleḍ tussnant fell-asen ad d-yaf ulac ammud n yisefra-k deg temkarḍiwin alammi d aseggas-a. Iwacu ur texdimeḍ ara ammud i yisefra-yik seg zik iwakken ad tettunefk tegnit i yimnadiyen ad xedmen fell-asen tasleḍt tussnant?

D tidet bdiɣ ttaruɣ isefra seg wasmi lliɣ mezziyeɣ, maca ugur-a n wammud yella deg snat tamiwin, tamzwarut; tagnit n usekles deg tazwara ttwaliɣ medden ḥemlen ad d-slen i tmedyezt s timawt, syin rriɣ lwelha-w ɣer usekles n uḍebsi i d-yeffɣen kra n yiseggasen aya ɣer deffir. Tis snat d tadrimt akked wakud, ɣas akken ttaruɣ war ḥebbus, maca mi ara εeddiɣ ad xedmeɣ ammud ttafeɣ uriɣ isefra meqqrit, ihi ilaq ad ten-zdiɣ akken ilaq lḥal, yerna ad             d-ten-waliɣ, ad d-ten-ferneɣ, ilaq ad sdakleɣ kulec, alammi d tura i ttefriɣ d yiman-iw, yerna tura ɣas yeffeɣ-d wammud-a s lemεiwna n Tdukkla Tadelsant Adrar n Fad, yusa-yi-d yiwen n ccɣel d ameqqran, imi bɣiɣ ad xedmeɣ asaru deg-s ad tili turart s yisefra, ɣef waya ur ssawḍeɣ ara ad xedmeɣ ammud n yisefra alammi d aseggas-a.

Dacu i d uguren i yettemlil umedyaz deg tudert-is, ladɣa akka am kečč ?

Ugur ameqqran yella deg temliliyin; imi uqant tegnatin anda ara d-yini umedyaz tasekla-s, yeqqim-d kan deg tfaskiwin am tin n udrar n fad akked tin n Summam, meḥsub drus maṭi n temliliyin i yellan deg tmurt-nneɣ, daɣen xussen leqdicat idelsanen anda yezmer umedyaz ad yessenfali, ad yesnerni tirmi-yines ɣef usayes. Ma yella d imedyazen am nekk cukkeɣ d yiwen n uεekkaz aɣ-yewten merra.

Dacu i d tifrat n waya ?

Ilaq ad yesseḥbiber yiwen ɣef drus n tfaskiwin i yellan, ad tent-iɛiwen s wayen iwumi yezmer, ma llant-d tiyyaḍ wicqa dayen i nessaram. Tidwilin daɣen ama deg yimaṭṭafen neɣ deg tilẓriyin anda ad tettunefk tegnit i umedyaz ad yessenfali ayen yettḥusu, iwakken ad as-d-slen medden.

Amek i tettwaliḍ imal n tewsit-a ?

Simal ttεeddin wussan, simal ttuɣalen waman ɣer tregwa; bɣiɣ ad d-iniɣ ass-a llan wid i iḥemmlen tamedyezt, ad as-slen, ad tt-ɣren, yettuɣal-d wazal-is cwiṭ, cwiṭ. Tura tettban-d tafat fell-as imi tuẓa ɣer sdat, umazal ad taẓ, d asirem ageɛmir, war ccek d tin ara d-yernun amaynut i tsekla dayen iwumi tesra tutlayt-nneɣ. Bɣiɣ kan ad d-rnuɣ ɣef tekti-nni n uɛeddi seg timawt ɣer tira, imedyazen imi ssawḍen ad arun, ad d-ɣren d tajmilt ad tuɣal i tddukliwin tidelsanin.

Yella wayen s tebɣiḍ ad tekfuḍ adiwenni-ya ?

Ad iniɣ tanemmirt d tagaεmirt i kra win i d-yefkan afus, afud iwakken ad yeffeɣ wammud-a ɣer tilawt, ad yettnuz deg temkerḍiwin am Mass Nabil Xaldi i yellan deg lmendad n tira, tanemmirt daɣen i Tdukkla Tadelsant Adrar n Fad i yellan deg tlmendad n usuffeɣ n wammud-a, tajmilt i nettat imi d-tefka tagnit iwakken ad senfaliɣ ayen ttḥulfaɣ ɣef usayes-s. War ma ttuɣ iεeggalen n tdukkla Tiɣri i yellan ɣer yidis-iw. Taggara ad d-iniɣ afud iǧehden i wid akk i iqeddcen ɣef tutlayt d yidles amaziɣ seg wul. Ad tkfuɣ s wayen i d-yenna Mulud Mɛemri:  » Win iḥerzen ayen yellan, yelha, win i t-yesnernan, yif-it ». Tanemmirt i wid mazal ttasmen ɣef tmagit-nsen akken ad yif idelsan n temnaḍin n umaḍal. Mazal lxir ɣer sdat.

Yesteqsa-t:  Aksil AKOUCHE

 

 

 

                         

A propos de l'auteur

Hichem B