Bgayet : aclax n tlelli n umeslay d tuṭfa n yimeɣnasen

8

Tagrawla taɣerfant n 22 deg furar, timental-is d lbaṭṭel yeḍran deg tmurt-nneɣ seg 1962 ar tura. Agdud yekreh timεict-is, yekker-d mgal tamḥeqranit alammi i d-yufrar uɣella unnig n yiserdasen Gayed Salaḥ. Yuɣal yeṭṭef tisura n leḥkem, yeɣli-d txuf ɣur kra n yimdanen wiyaḍ ddan deg ubrid n uɣella-nsen. Maca wid yeffuden tilelli mazal ttnaɣen fell-as gar yimeɣnasen n tlelli ad d-naf iεeggalen n tdukkla RAJ.

Membaεed amnaε n tesdawit n unebdu i tdukkla Raj deg wussan yezrin mebla timentelt. Ass-a aselway n tdukkla RAJ akked yiεeggalen-is heggan-d tasdawit taɣerfant. Iswan seg temlilit d ameslay ɣef waddad n tmurt tura akked umussu aɣerfan anda yewweḍ. Maca iɣallen n laman “BRI” s tanḍa n uɣella-nsen sxerben timlilit-a; yerna ṭṭfen aṭas n yineɣmasen ɣer lḥebs.

Gar yimeɣnasen yettwaṭṭfen aselway n RAJ Abdelouhab Fersaoui, tamḥaddit Zahra Harfouche akked Said Salhi akked waṭas n yiεeggalen n tdukkla RAJ d yineɣmasen n yizerfan n umdan. Maca mebaεed tikli xedmen waṭas n yimeɣnasen yellan dina tettunefk-asen-d tlelli. Deffir n userreḥ n yimeɣnasen yella-d unejmuε deg ubraḥ Said Meqbel. Aselway n RAJ yeṭṭef awal yules-d ayen ad as-yeḍran i netta d yimdukkal-is. Wid yekkin deg unejmuε sawalen s kra n tmenna: « Ulac, ulac, ulac tifranin, ulac ». « Madaniya mačči εaskariya ».

« Ulac tifranin ya Lεisabat”. “Ad nerreẓ wala, ad neknu », « Neεya seg udabu amesbaṭli ». « Serreḥ-t-d i warraw-nneɣ ṭṭfet arraw n Gayed ». Imsuddsen n  tmeskant-a ṭṭfen awal, ssumlen-d tigawin xeddmen at udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren d yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Comments
Loading...