Tamazight

Bgayet: asfuggel n tefsut n 80 akked 2001

Tikli n Yebrir di Bgayet
Ecrit par Amaziɣ Illeli

Imezdaɣ n waɣir n Bgayet am yal tikkelt ur ğğin ara ass yecban wa, ad iεeddi kan akka war ma smektin-d wid yettun ɣef tmesbaniyin yeḍran deg yebrir n useggas n 1980 akked, temḥeqranit n yijaḍarmiyen i yeḍran deg useggas 2001 i d-yeglan s tmenɣiwt n 120 n yilmeẓẓyen n tmurt n Leqbayel. Asfuggel n tikkelt-a yif wid n yiseggasen yezrin imi sin n wussan n tuṭṭfa n ubrid ameqqran deg tlemmast n waɣir n Bgayet s tikliwin timelwayin mgal adabu amesbaṭli yenɣan arraw n tlelli war ma yesḥasef fell-asen.

Imezdaɣ n waɣir n Bgayet akken ma llan, ffɣen-d ɣer ubrid ssuddsen-d tikli tamelwayt mgal tawaɣit-a i yeḍran deg tmurt deg useggas n 80 akked useggas 2001. Iswi amatu seg tikli-ya d asebgen n lɣiḍ ɣef temḥeqranit i d-yellan sɣur wid yeṭṭffen tisura n leḥkem. Am wakken i d-yella usuter n uḥaseb n wid yekkin deg tmenɣiwt n yilmeẓẓyen n tmurt n Leqbayel. War ma nettu abeddel n tserti n udabu seg uẓar imi adabu-ya yella mgal lebɣi n uɣref Amaziɣ s umata akked uqbayli ladɣa. Daɣen d tasummelt ɣef uqmaḍ n udabu i tlelli n uɣref, syin addad deg wacu tella tmurt s umata.

Tikli-ya teḍra deg tlemmast n temdint n Bgayet, tekkin deg-s ugar n 100 000 n yimdanen gar-asen tgejda n umussu asertan. Acku ẓran, yerna umnen belli ilaq ad d-yili ubeddel n waddad n tmurt seg uẓar-is. Imezdaɣ n waɣir n Bgayet am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk. Tameskant-a, ad d-tili d tameskant tasertant mgal adabu amhersan, amesbaṭli yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud. Aɣref yeεya seg tsertit tujḥift n uwanak, imi tilelli-s tettwaqmeḍ, ma yella d tamεict-is mazal ur d-tuɣal ara d tamεict n umdan ilelli.

Aɣref Amaziɣ akked uqbayli ladɣa ssuturen, ad d-tili tlelli n ugdud akked tella deg ugraw n Ssumam. Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d isegral. Maca d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen.

A. I

A propos de l'auteur

Amaziɣ Illeli