Kabylie Tamazight

Bgayet: Imastanen mgal adabu

Ecrit par Amaziɣ Illeli

Tasebḥit n wass-a ffɣen-d yibugaṭuten deg tlemmast n temdint n Bgayet mgal tasertit n uwanak, anda ssuturen ad d-yili uwanak n yizerfan. Deffir n tekliwin timelwayin i yeḍran deg waṭas n lwilayat n tmurt deg wussan yezrin.

Ibugaṭuten, ffɣen-d ɣer yiberdan ssuddsen-d tikli tamelwayt mgal tasertit n uwanak deg wayen yerzan izerfan n umdan. Iswi amatu seg tikli-ya d asebgen n lɣiḍ ɣef waṭas n yisuḍaf i yellan deg tmendawt, anida ulac aqader n yizerfan n umdan. Daɣen taserti n udabu mgal lebɣi n uɣref. Am wakken ttnadin ɣef tukksa n uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata deg wayen yerzan taɣdemt, izerfan…

Tikli-ya teḍra deg tlemmast n lawilaya n Bgayet, tekkin deg-s tgejda n umussu n yizerfan n umdan, akked waṭas n yibugaṭuten acku ẓran, yerna umnen belli ilaq ad d-yili ubeddel n waddad n tmurt seg uẓar-is deg wayen yerzan izerfan. Ibugaṭuten n Bgayet am yal tikkelt ttilin deg tama n ugdud imi nutni d imazzagen n uzref, ttwalin tasertit n uwanak deg wayen yerzan tilelli n teɣdemt ilaq ad d-tili, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk.

Ffɣen-d ɣer ubrid s tikli tamelwayt mgal adabu amesbaṭli. Ibugaṭuten d nutni i d-imḥadan n uɣref ttwalin ass-a, yessaweḍ udabu alammi yečča azref n ugdud, yerna yettmeslay s yisem-is i tmura n berra. Ibugaṭuten ddan d uɣref, ssawalen s kra n tmenna “ Taɣdemt, d tilellit”, “ Tilelli n ugdud” “ Tikli tamelwayt d azref n umdan” “ Alaɣ i uqmaḍ n tlelli n tikliwin timelwayin”.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d isegral, maca d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg talwit.

Amaziɣ Ilelli

A propos de l'auteur

Amaziɣ Illeli