Kabylie Tamazight

Bgayet : Tasdawit d tesnawiyin mgal tis 5

Ecrit par Hichem B

Deffir n usεuzeg i ssut n uɣref. D usderɣel ɣef lebɣi n ugdud. D ukkemmel deg tiderwect-nsen, ula d agdud la ken-d-yeqqar: “ Ala Ala Ala i tis 5”. Tanezzayt n wass, inelmaden d yiselmaden n tesnawiyin d tesdawiyin n umaḍal. Ttruḥun ad bnun timussniwin timaynutin. Ma yella deg tmurt-nneɣ teffaɣen-d ɣer yiberdan ttnadin ɣef uzref-nsen. Bgayet am yal tikkelt mgal tasertit n uwanak, i d-yeffɣen s uberreḥ mgal lebɣi n ugdud, deffir n tekliwin timelwayin i yeḍran deg waṭas n lwilayat n tmurt deg wussan yezrin. Daɣen ilmend n tikkin n uselway n tigduda  Butefliqa i tikkelt tis semmus deg tefranin tiselwayin ara yilin ass n 18 deg yebrir i d-iteddun.

Inelmaden d yiselmaden n tesdawit d tesnawiyin n Bgayet, ffɣen-d ɣer yiberdan ssuddsen-d tikli tamelwayt mgal tawaɣit-a i yeḍran deg tmurt. Iswi agejdan seg tikli-ya d aqlaε n udabu seg uẓar, daɣen asebgen n lɣiḍ ɣef tikkin n Butefliqa deg tefranin tiselwayin i tikkelt tis 5, akked taserti n udabu mgal lebɣi n uɣref.

Daɣen d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikli-ya teḍra deg tlemmast n lawilaya n Bgayet, tekkin deg-s tgejda n umussu asertan, ama d inelmaden neɣ d iselmaden acku ẓran, yerna umnen belli ilaq ad d-yili ubeddel n waddad n  tmurt seg uẓar-is, mačči ɣef tikkin n Butefliqa deg tefranin. Inelmaden n Bgayet am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk. Ffɣen-d ɣer ubrid s tikli tamelwayt mgal adabu amesbaṭli.

Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05 ». « Ulac, ulac, ulac ssmaḥ, ulac ». » Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Sdat n lawilaya yella-d yiwen n unejmuε d ameqqran. Imsuddsen n  tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam. Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Amaziɣ Ilelli

 

A propos de l'auteur

Hichem B