Tamazight

Bgayet: tasdawit-nneɣ mgal tasertit-nwen

Ecrit par Amaziɣ Illeli

I tikkelt tis 12 inelmaden n tesdawit n Bgayet ffɣen-d mgal tasertit n uwanak. Tasebḥit n wass-a ffɣen-d yinelmaden d yiselmaden n tesdawit n Bgayet s tikli tamelwayt mgal tasertit n uwanak, i d-yeffɣen s uberreḥ mgal lebɣi n ugdud, deffir n tekliwin timelwayin i yeḍran deg waṭas n lwilayat n tmurt deg wussan yezrin. Daɣen ilmend n tefranin tiselwayin ara yilin ass n 04 deg yulyu i d-iteddun.

Inelmaden d yiselmaden n tesdawit n Bgayet, ffɣen-d ɣer ubrid ssuddsen-d tikli tamelwayt mgal tawaɣit-a i yeḍran deg tmurt. Iswi amatu seg tikli-ya d asebgen n lɣiḍ ɣef rray i yeffɣen seg tama n Bensalaḥ. Daɣen taserti n udabu mgal lebɣi n uɣref. Tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikli-ya teḍra deg tlemmast n waɣir n Bgayet, tekkin deg-s tgejda n umussu asertan, ama d inelmaden neɣ d iselmaden acku ẓran, yerna umnen belli ilaq ad d-yili ubeddel n waddad n tmurt seg uẓar-is, mačči ɣef uḥaseb n wid yukren neɣ s tuṭṭfa-nsen ɣer leḥbusa akken i d-qqaren. Inelmaden n Bgayet am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk. Ffɣen-d ɣer ubrid s tikli tamelwayt mgal adabu amesbaṭli.

Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan addad deg wacu yella. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ulac, ulac, ulac ssmaḥ, ulac ». » Ya Lgayed, ya Bensalaḥ Lezzayer d tamurt-nneɣ”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Amaziɣ Ilelli

A propos de l'auteur

Amaziɣ Illeli