Tamazight

Bgayet: Telha s ṛṛuḥ n yimeɣnasen-is

Tikli n Bgayet
Ecrit par Amaziɣ Illeli

Ffɣen-d yimezdaɣ n waɣir n Bgayet am yal tikkelt mgal tasertit n uwanak, i d-yeffɣen ula d netta s uberreḥ mgal lebɣi n ugdud yettnaɣen yid-s s tektiwin ugar n wayyur aya. Deffir n tekliwin timelwayin i yeḍran deg waṭas n lwilayat n tmurt deg wussan yezrin aṭas n yigensasen n uwanak i d-yeffɣen s uberreḥ i d-yellan mgal n wayen yessutur uɣref. Daɣen ilmend n uberreḥ n Bensalaḥ s tefranin tiselwayin ara yilin ass n 04 deg yulyu i d-iteddun.

Imezdaɣ n waɣir n Bgayet akken ma llan, ffɣen-d ɣer ubrid ssuddsen-d tikli tamelwayt mgal tawaɣit-a i yeḍran deg tmurt. Iswi amatu seg tikli-ya d asebgen n lɣiḍ ɣef temḥeqranit i d-yellan sɣur wid yeṭṭffen tisura n leḥkem. Am wakken i d-yella usuter n ubeddel n tserti n udabu seg uẓar imi adabu-ya yella mgal lebɣi n uɣref. Daɣen d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikli-ya teḍra deg tlemmast n temdint n Bgayet, tekkin deg-s ugar n 60000 n yimdanen gar-asen tgejda n umussu asertan. Acku ẓran, yerna umnen belli ilaq ad d-yili ubeddel n waddad n tmurt seg uẓar-is, mačči ɣef ubeddel n yineɣlafen neɣ tukksa d urnaw n wudmawen-nniḍen n uwanak. Imezdaɣ n waɣir n Bgayet am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk. Tameskant-a, ad d-tili d tameskant tasertant mgal adabu amhersan, amesbaṭli yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud. Aɣref yeεya seg tsertit tujḥift n uwanak, imi tilelli-s tettwaqmeḍ, ma yella d tamεict-is mazal ur d-tuɣal ara d tamεict n umdan ilelli.

Aɣref yessutr, ad d-tili tlelli n ugdud akked tella deg ugraw n Ssumam. Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d isegral. Maca d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen.

A. I

A propos de l'auteur

Amaziɣ Illeli