Kabylie Tamazight

Bgayet: timlilit Asqamu Unnig n Timmuzɣa

Ecrit par Hichem B

Asekwen n tsuqilt n ugbur n usmil unsib n uɣlif n teɣdemt yettkemmil lecɣalat-is.

Akken tebɣu temhaz tutlayt, maca tesra i tsuqilt iwakken ad tnerrni, neɣ ad terr iḍrisen yellan deg tutlayin-nniḍen ɣer tutlayt deg wacu i d-nernan; imi aṭas deg-sen ddmen idles, tamagit, tumast… Mass Si El Hachemi Assad amaray amatu n Usqamu Unnig n Timuzɣa yeḥsa s wazal tesεa tsuqilt deg usnerni d usemhez n tmaziɣt iwakken ad tezmir ad tekcem deg waṭas n taɣulin, daɣen ad yizmir yiwen ad tt-isemres deg tsudwin n uwanek “ tawennaḍt, tadamsa, taɣamsa, taɣdemt”.

Ilmend n wazal tesεa tsuqilt deg usemhez n tmaziɣt Asqamu Unnig n Timmuzɣa iheyya-d timlilit tis snat deg waɣir n Bgayet i yebdan ass 06 deg furar 2019 s teldayt tunsibt deg temkerḍa n tɣiwant n Bgayet. Deg teldayt tunsibt i yebdan ɣef 10h05 mbaεed imseɣret aɣelnaw. Aselway n tɣiwant n Bgayet mass Merzugi Ḥussin deg wawal-is yenna-d: “ S lferḥ d ameqqran ara d-ldiɣ tiwwura n temkerḍa n tɣiwant i Usqamu Unnig n Timmuzɣa akked yinebgiwen-is iwakken ad temmag temlilit-a akken iwata lḥal. Nekkni ur nezmir ara ad nemneε leqdic yecban wa imi leqdic-a yesεa azal d ameqqran deg usemhez n tutlayt n tmaziɣt. Nekkni nezmer ad nernu tarmit-nneɣ iwakken ad tawḍem ɣer yiswi-nwen”.

Syin yettunefk wawal i umaray amatu n Usqamu Unnig n Timmuzɣa mass Si El Hachemi Assad i d-yewwin awal ɣef wazal tesεa tsuqilt deg usemhez n tmaziɣt yenna-d:“ Tasuqilt tesεa azal d ameqqran deg usemhez n tutlayt. Akken tebɣu temhaz tutlayt, maca tesra i tsuqilt iwakken ad tnerrni ugar. Tutlayt n tmaziɣt tesra  i tsuqilt n yiḍrisen yellan deg tutlayin-nniḍen ɣer tutlayt deg wacu i d-nernan. Acku aṭas deg-sen ddmen idles, tamagit, tumast n tmetti deg wacu d-nulfan. Nekkni s Usqamu Unnig n Timmuzɣa ad nefk ayen iwumi nezmer iwakken ad yenjeḥ leqdic yecban wa.

Timlilit yecban ta tesεa azal d ameqqran deg usemhez n tutlayt-nneɣ. Nekkni Asqamu Unnig n Timmuzɣa yettuḥettem fell-aɣ lḥal iwakken ad nefk ahat ugar n tezmert-nneɣ iwakken ad d-nini belli tamaziɣt d tutlayt am tutlayin-nniḍen tezmer ad tili deg yal taɣult, akken tebɣu tili tsudut tezmer ad tessemres tamaziɣt deg leqdicat-is”. Deg taggara yettunefk wawal i mass lwali n Bgayet mass Ḥmed Maεbed awali n Bgayet i d-iberḥen s teldayt tunsibt n usekwen n tsuqilt n ugbur n usmil unsib n uɣlif n teɣdemt. Deffir n teldayt tunsibt tella-d temlilit akked yineɣmasen. Deffir n temlilit akked yineɣmasen tella-d tegnit n ustaεfu syin bdan leqdicat n usekwen n tsuqilt n ugbur n usmil unsib n uɣlif n teɣdemt.  Mazal yettkemmil leqdic-a ar assa.

Nacer Akouche

 

A propos de l'auteur

Hichem B