Culture Kabylie Tamazight Une

Bgayet : ukuẓ n wussan d aqeddic ɣef tsuqilt seg, ɣer tmaziɣt

Ecrit par Hichem B

Asqamu Unnig n Timmuzɣa yessuds-d yiwet n temlilits wazal-is ɣef tsuqilt seg, ɣer tmaziɣt agbur  n usmil unsib n uɣlif n teɣdemt. Timlilit tamezwaru tella-d deg Adrir anda i yebda leqdic amezwaru, syin yella-d umeslay ɣef temlilit tis snat i yebdan ass n ahad yezrin, temdel tiwwura-s assa deg Bgayet s usali n usenfar-a ara d-yuɣalen s nnfaε i merra Izzayriyen.

Taggara n umalas d aqeddic war leεḍil ɣef tsuqilt seg ɣer tmaziɣt agbur n usmil unsib n uɣlif n teɣdemt. Mass Si El Hachemi Assad amaray amatu n Usqamu Unnig n Timuzɣa yeḥsa s wazal tesεa tsuqilt deg usemhez n tutlayt n tmaziɣt d wamek ara tili d tutlayt ara yesqedcen deg waṭas n tsuddutin n wanak,  ɣef waya yaεreḍ iwakken ad isekcem tamaziɣt deg uɣlif n teɣdem, imi aɣlif-a yesεa azal d ameqqran deg tudert n merra Izzayriyen, acku deg uɣlif-a i d-yettili useqdec d umeslay ɣef yizerfan n umdan d amek ad tili tlelli n uɣref. Tikelt-a aqeddic iressa ɣef tsuqilt n usmil n uɣlif n teɣdemt ara yebdun axeddim-is deg uzeṭṭa ass 21 deg furar ilmend n wass agraɣlan n tutlayt tayemmat. Ilmend n wahil i d-yebna Usqammu Unnig n Timmuzɣ imi d netta i d-yessudsen timlilit-a i yellan  s wazal-is, timlilit-a tdum ukuẓ n wussan, tebda ass n ahad yezrin tekfa assa. Asqamu Unnig n Timmuzɣa igra tiɣri i kra win izemren ad d-yernu kra i leqdic-a. Aṭas i d-yerran i tiɣri usan-d seg yal tamnaḍt iwakken ad ḥeḍren yerna ad d-fken timussniwin-nsen, llan deg-sen imazzagen, iselmaden, imassanen, iseddawanen, iselmaden n tutlayt n tmaziɣt.

Deg tazwara n uqeddic yella-d ufraq n waraten ara d-yettwasuqlen, syin yella-d umeslay ɣef tarrayt ara yettwasmersen deg tsuqilt, iwakken ur d-yettili ara umgired d umxalef deg tsuqilt, yerna ilaq ad d-yili umsefhem ɣef wawalen imaynuten. Yal agraw yeṭṭef arat-is yebda asuqel deg-s s usemres n yimawalen yellan yakan ara aɣ-iεiwnen deg tsuqilt, am wakken daɣen deg yal tikelt yettili-d umsefhem ɣef usnulfu n wawal amaynut iwakken ad ishil usesfer n yizen, neɣ amek yezmer yiwen ad inadi ɣef wayen ad t-iceɣben s tutlayt n tmaziɣt deg usmil n uɣlif n teɣdemt. Deg taggara n usekwen n tsuqilt tella-d tufɣa s yiwellihen-a: asewseε n usemres n tmaziɣt deg merra udmawen n tsudwin yettafaren i uɣlif n teɣdemt am tesweḍt tamatut, gar yiwellihen-a: Asekcem n tmaziɣt deg usileɣ i d-yettilin deg yiɣerbazen n uɣlif n teɣdemt. Asekcem n urmud n tmaziɣt deg yiɣerbazen akked yixxamen n uzref. Tira n tsigtin yettafaren ɣer uɣlif n teɣdemt s tmaziɣt.

Agbur n usmil unsib n uɣlif n teɣdemt ad yebdu axeddim s tmaziɣt, ass 21 deg furar ilmend n wass agraɣlan n tutlayt tayemmat.

Nacer Akouche

A propos de l'auteur

Hichem B