Dergina: asyax deg ubrid aɣelnaw N°09

11

Seld tiyta n lehwa i d-yellan s xirella, deg waṭas n tamiwin n tmurt, anda i d-kkren iḥumal, d taliwin deg tuget n yimukan. Tugett n waman yettazalen deg lexla, glan-d s yisyaxen n wakal deg waṭas n tamnaḍin. Maca tawaɣit tameqqrant teḍra deg ubrid aɣelnaw wis tẓa i zeddin gar waɣir n Bgayet akked wilaya n Sṭif, deg Umṭiq Ujebbuj.

Deffir lehwa i d-yellan s waṭas deg ssaεtin yezrin i d-yeglan s urgal n waṭas n yiberdan, d usyax n wakal deg tuget n tamiwin n waɣir. Maca tawaɣit tagaεmirt teḍra deg ubrid aɣelnaw wis tẓa. Anda azgen seg ubrid wwin-t waman. Aṭas n taɣiwant ara inṭṭerren s usyax n ubrid yeqqnen sgar nat n lwilayat. Taluft-a n usyax teḍra-d s tmental n waman i d-yellan s tugett, ɣas akken yella-d ufus n tallelt sɣur tkebbanit n lbaylek maca aya ur d-yegli ara s tifrart n wugur, imi yal tiyta n lehwa tettuɣal-d taluft-a n usyax n ubrid.

D lawan ad d-tili tifrart n wugur-a akken iwata lḥal uqbel ad ifat lawan imi d imezdaɣ n waṭas n tɣiwanin akked tuddar-nnsen ara inṭerren nezzeh s yisyaxen i d-yettilin deg ubrid-a aɣelnaw. Ma yella ur d-tegri ara tsuddut lecɣal n baylek n waɣir neɣ taɣelnawt ad d-afen tifrart iwulmen i wugur-a mačči d taxeyyaṭ n yicerrigen. Hata twalam igemmaḍ n lecɣal ur nemmug ara akken iwata lḥal. Abrid-a yesεa azal meqqer deg tudert n yimezdaɣ imi yeqqen akked lwilaya n Sṭif.

Yal ass yettzid ucerreg n ubrid. Imezdaɣ ttnadin tifrart yelhan i wugur-a. Tadyant-a tella-d ahat s tmental n waman wid yettazalen ddaw n tmurt, neɣ d astehzi n wid terza temsalt. Tadyant-a teǧǧan lǧerrat d ccwami, mačči kkan deg wallaɣ n yimezdaɣ n temnaḍin-a, yekcem uḥeyyir, d uxemmem amek ara tefru taluft ? imi ur d-iban ara yixef-is; ɣas akken, yella-d unekcum n yiεeggalen n tkebbanit n lbaylek. Anekcum-a yella-d s wallalen n uqaεed n yiberdan, d uwelleh n yimsebriden ɣef usyax-a. Maca « yeɣleb ucerrig tafawet ».

Ɣas akken yella-d ulethi sɣur yiεeggalen n tenmehla n lecɣal n lbaylek « D.T.P ». Maca mazal taluft tettkemmil. Abrid-a d win yeqqnen gar Bgayet akked Sṭif, d abrid n yesεan azal d ameqqran deg tdamsa. Ɣas akken yella-d uwelleh n medden. Maca mazal iḥedder wakal kkan. Taluft ur teḥbis ara kkan da, maca abrid yettwaɣ yeqqim-d deg-s uzgen. Imezdaɣ n tɣiwanin akked yimsebriden i yettawin abrid-a nṭṭerren s twaɣit-a, imi ẓẓran d akken d taεkumt ẓẓayen ɣef tuyat, imi tifrart-is ur tban ara, ar tura. Ahat ad yili uqaεed-is deg wussan i d-iteddun.
Amaziɣ Ilelli

Comments
Loading...