Politique Tamazight

Lezzayer tura: tanekra taɣerfant, mgal adabu amesbaṭli

Tikli mgal adabu
Ecrit par Amaziɣ Illeli

A wid aɣ-iḥekmen, d lawan ad d-tuḥem, ad thenni tmurt deg-wen. Ulac win ara aken-irun. Ad hennin warrac dayen. Tenekra taɣerfant tebda deg wayyur n furar  yezrin mazal tettkemmil ar tura. Ɣas akken tella lehwa s waṭas, anda tessaweḍ tbellaε aṭas n yiberdan, yerna kkren-d yiḥumal. Maca aya ur yergil ara tikli n uɣref i d-yellan deg waṭas n waɣiren n tmurt. Aɣref yeffud tilelli, yerwa iḥumal n waman. Agdud yettnadi aseggem n tmurt, ad tuɣal, ad tecbu timura n ddunit.

Tikkelt-a mačči kan mgal leɣla n sselεa maca yugar waya; agdud  isutur abeddel n uwanak seg uẓar iwakken ad tettwasbed-d tigduda tis snat. Agdud yeggul ur yeḥnit ma mazal yedder awanak ad yettwaqlaε  seg uẓar. Itikkelt-nniḍen agdud issuddes-d tikliwin timelwayin mgal tasertit n uwanak deg yal taɣult, ladɣa deffir n wayen i d-iberreḥ n uɣlif n lecɣal n berra Mass Remḍan Laεmamra. Daɣen Ilmend n uwexxer n tefranin.

Imezdaɣ n tmurt n Lezzayer ssuddsen-d tikliwin timelwayin i ḍerrun yal ass, deg tlemmast n temdinin timeqqranin. Iswi n tikliwin d asebgen n lɣiḍ ɣef uberreḥ n uwanak mgal lebɣi n ugdud, deffir n tekliwin yeḍran deg wussan yezrin, daɣen ayen yexdem mass Remḍan Laεmamra mi yettnadi tiwizi n tmura n berra bgal tenekra n uɣref. Tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, daɣen liḥala deg wacu tella tmurt s umata. Tikliwin ad ilint d amedya i wid yebɣan ad rren tilelli i tmurt-nsen, daɣen d tajmilt i wid yefkan tudert-nsen iwakken ad d-yidir mmi-s Uzzayri d ilelli ilebda, am wakken ad ilint d asnemmer i kra win iqeddcen ɣef tlelli, tamagit, tumast…

Tekkint deg tikliwin, tgejda n umussu asertan, acku ẓran, yerna umnen s ubeddel. Imi d win i d lsas n uqeεεed n tmurt. Tameskant-a, ad d-tili d tameskant tasertant, imi tilelli n ugdud akked temεic-it mazal ur d-tuɣal ara d tamεict n umdan ilelli deg wakal-is. Deg tikliwin tekkin deg-s d imelyan n yimdanen, imekkiyen deg tikli-ya ssawalen s kra n tmenna, am : « Ulac, ulac, ulac ssmaḥ, ulac ». “Ad nerreẓ wala, ad neknu », « Neεya seg udabu-ya ». « Adabu amesbaṭli ». « Naεya seg yiɣeblan, nebɣa lxedma ». Imsuddsen n  tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, maca- d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid ad t-inebḍen. Win umi iruḥ yidles-is, d yiles-is neɣ yettu aẓar-is, ad yeggri deg tatut, ad yezdel fell-as ddel d lbaṭel.

A I

A propos de l'auteur

Amaziɣ Illeli