Economie Kabylie Tamazight

Ma tizdig twennaḍt, d imezdaɣ-is i yizdigen

Ecrit par Amaziɣ Illeli

D azamul i ddmen yimezdaɣ n tɣiwant n At Smaεel ass-a deg temlilit i d-yellan deg tesga n tɣiwant. Asqamu aɣerfan n tɣiwant akked yiεeggalen n tdukkliwin yimxalafen i qeddcen deg tɣiwant akked waṭas n yimezdaɣ i ḥeḍren deg temlilit-a i d-iheyya uselway n tɣiwant mass Rebai Sadek. Iswi seg temlilit-a d asegzi n usenfar amaynut yaεni amek ad d-yili utekki n tɣiwant deg umyizwer n tezdeg n twennaḍt i d-yettilin deg yal aseggas.

Tebda temlilit neɣ anejmuε s wawal sɣur uselway n tɣiwant anda i d-iserḥeb smerra wid i d-irran i tiɣri. Syin yebda asegzi ɣef usenfar amaynut d wamek ara d-tekkin merra yimezdaɣ deg usebd-d-is, imi asenfar-a neɣ amyizwer-a ad d-yuɣal s lɣella neɣ nnfaε ɣef yimezdaɣ ; ama tewwi-d amḍiq amezwaru neɣ ur d-tḥelli ara amḍiq amezwaru, imi asenfar-a d aεiwed i waṭas n yimukan ansayanen, am taliwin, iberdan n lbaylek, daɣen asuneɣ n leḥyuḍ s yizamulen ansayanen. Deg usegzi n takkayin n usebd-d n usenfar i yebḍan ɣef kraḍ : asɣiwes, ajmaε n tedrimt ilaqen, aseḍru. Syin yegla-d s yiswan yellan deffir n usenfar-a. Atekki n merra imezdaɣ deg uheyyi d useḍru. Asmuzzeɣ d usezdeg n twennaḍt.

Ajmaε n yimezdaɣ ɣef yiwen n umahil. Atekki n tdukkliwin n tɣiwant deg leqdic-a. Syin yettunef wawal i Mass Saḥli Abedlkader i yellan deg usqamu aɣerfan n lwilaya ula d netta imeslay-d ɣef wazal i yesεa usenfar-a deg usemhez n tɣiwant. Yenna-d : « Tawennaḍt tesεa azal d ameqqran deg tudert n umdan, ilaq yal yiwen deg-nneɣ ad d-iseḥbiber fell-as ». Yerna-d daɣen asenfar-a mačči kan d asizdeg n twennaḍt maca allus n waṭas n wudmawen i d-yeskanayen taɣiwant am wudem n tmesgida, iberdan, udmawen n tḥuna, aεiwed n tira i tsigtin s tmaziɣt. Deg ubrid n usqerdec ɣef takkayin n usenfar-a rnan-d kra n tektiwin am : Asras n tesqamut n uqeddic. Imukan ara yemmaggen. Asras n tesqamut n usenfar. Aɣella n usenfar.

Yenna-d uselway n tɣiwant deg unejmuε-a : «  D lawan ad d-nezdit iɣallen ɣef leqdic-a, ad d-neğğ timuɣliwn tisertanin deg rrif, ad d-nesεut yiwet n tmuɣli, d asizdeg n twennaḍt ». Llan aṭas n yimukan ara yemmaggen neɣ ara tettwaεiwden am tmesgida n At Smaεel, aɣerbaz n tregragt taqdimt, talemmast n taddart, tasga n tɣiwant. Asenfar-a iεjeb i mezza imezdaɣ n tɣiwant ula d nutni fkan-d ttiεad i wass n sem i d-iteddun iwakken ad meslayen ɣef yiberdan ara aten-yessufɣen ɣer tafat.

Nacer AKOUCHE

A propos de l'auteur

Amaziɣ Illeli