Tasertit : agdud yeffeɣ-d εinani i Gaïd Salah

27

D lğemεa tis 29, agdud mazal yetteffaɣ-d ɣer yiberdan, yessutur abeddel n uwanak seg uẓar. D imelyan i yimdanen i d-yeffɣen ɣer yiberdan ttmeğğiden-d s tmenna timḥeqranit n uɣella unnig n yiserdasen izzayriyen Gayed Salaḥ yessuturen ad d-ilint tefranin tiselwayin deg ussan i d-iteddun mebla aressi n sin yisuḍaf-a «  7- 8 » unsiben yellan deg tmendawt. I tikkelt tis 29 agdud azzayri yeffuden tilelli yeffeɣ-d deg yal aɣir n tmurt yessutur atixer n Gayed Salaḥ.

Tikliwin-a ḍrant mačči kan deg Bgayet, maca deg waṭas n lwilayat n tmurt. Tekkint deg tekliwin-a tgejda n umussu asertan, acku ẓran, yerna umnen belli ilaq ad d-yili ubeddel deg waddad n tmurt. Aɣref yumen belli ma yella yessusem ɣef uzref-is, adabu amesbaṭli am wa, d awezɣi ad as-t-id-yefk. Yeffeɣ-d uɣref ɣer yiberdan s tikliwin timelwayin i tikkelt tis 29 mgal adabu amesbaṭli yeffeɣen i tmendawt. Maca yella-d lḥers sɣur yiɣallen n laman deg waṭas n yimukan ladɣa deg ubrid ameqqran yettawin ɣer Lezzayer tamanaɣt.

Maca lebɣi d tezmert yekkes tugdi seg wulawen yella-d ukemmel n tikliwin deg talwit, imi d win i d lsas n uqeεεed n tmurt-nneɣ. Tikliwin-a seg tazwara ar tura llan-d mgal adabu amhersan yeṭṭfen tisura n leḥkem deg ufus-is, seg 1962 ar ass-a. Yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli.

Imekkiyen deg tikli-ya ssawalen s kra n tmenna, am : « Ulac tifranin ya Lεisabat”.” Ala, ala, ala i leḥkem aserdasan ». « Ulac, ulac, ulac ssmaḥ, ulac ».«  Gayed Salaḥ tixer”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Comments
Loading...