Kabylie Politique

Tasertit : Bgayet, tebra i uwanak amesbaṭli

Manifestation. Ph/Archives
Ecrit par Amaziɣ Illeli

Imezdaɣ n waɣir n Bgayet, akken ma llan, ddan d yiwen n ufus stenyan ɣef tinebrit n uwanak s tikli tamelwayt i d-yellan ass-a deg tlemmast n temdint. Ibgaytiyen akken ma llan mgal tasertit n uwanek, deg yal taɣult. Tikli n tikkelt-a txulef tiyaḍ, imi mačči s drus. Maca s tuget n yimezdaɣ tekkin deg tuffɣa ɣer ubrid, tettnadi ɣef yizerfan ad as-yettwakksen i netta akked warraw-nsen sɣur wid yeṭṭfen tisura n leḥkem seg 1962 ar ass-a. Assa ugar n 100 000 n yimdanen i yekkin deg tikli tamelwayt, i yeḍran deg tlemmast n waɣir n Bgayet. Aɣref Azzayri yerra-d i tiɣri n Wember 1954. Tura yerra-d i tiɣri n furar. Tikli teḍra tameddit n wass, tebda seg uxxam n yidles Ṭawes Ɛamruc “ Bgayet”, alamma d Lexmis. Imekkiyen zzin-d i temdint n Bgayet am tmeqyast.

At udabu ɣas akken ẓran belli tuget, neɣ azgen ameqqran n Yizzayriyen, ur bɣin ara ad qqimen deg leḥkem. Maca tiqit yeččuren lkas, d iberriḥen n yimḍebren imenza n tmurt s tmuɣliwin yeffɣen mgal lebɣi n ugdud. Tawaɣit-nniḍen aberreḥ n yimḍebren n uwanak am Nurdin Bedwi akked Remḍan Laεmamra deg tiliẓri taɣelnawt, akked tiliẓriyat tusligin, deg uberreḥ-a ttmeslayen s yisem n uɣref, belli d netta i d-yessutren awexxer n tefranin. Aɣref yettwali deffir n uberreḥ-a belli iqerra n uwanak stehzayen yes-s. Syin tella-d tuffɣa n uɣref ɣer yiberdan s tikliwin timelwayin, imi yettwali belli awanak ur d-yecliε ara s uɣref, ixeddem ayen yeffɣen fell-as netta, akked wid yeddan yid-s, wama aɣref d zyada. Deffir n uberreḥ n uselway n Fransa s usebɣes n uwanak ɣef rray i d-yefka, yeffeɣ-d uɣref yefka-s tiririt yestahel.

Tikliwin-a ḍrant mačči kan deg Bgayet, maca deg waṭas n lwilayat n tmurt. Tekkint deg tekliwin-a tgejda n umussu asertan, acku ẓran, yerna umnen belli ilaq ad d-yili ubeddel deg tmurt. Aɣref yumen belli ma yella yessusem ɣef uzref-is, adabu amesbaṭli am wa, d awezɣi ad as-t-id-yefk. Yeffeɣ-d uɣref ɣer yiberdan s tikliwin timelwayin mgal adabu amesbaṭli. Maca yella-d ukemmel n tikliwin, imi d win i d lsas n uqeεεed n tmurt-nneɣ. Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is, seg 1962 ar ass-a. Yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan liḥala-ya. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05 ». « Ulac, ulac, ulac ssmaḥ, ulac ».«  Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Amaziɣ Ilelli

A propos de l'auteur

Amaziɣ Illeli