Tamazight Une

Tasertit: Iselmaden n Bgayet, mgal tasertit n uwanak

Tasertit: Iselmaden n Bgayet, mgal tasertit n uwanak
Ecrit par Amaziɣ Illeli

Send asunded amatu, idumen ugar n ukuẓ n wussan. Asunded iḥuzan aṭas n tkebbaniyin n uwanak am Sunatrak, Sunalgaz, d waṭas n lweznawat akked tḥuna, anda adgud yessutur abeddel n uwanak seg uẓal. Yeffeɣ-d yisali dakken aselway n tigduda mass Butefliqa, yejbed iman-is seg tefranin, daɣen yella-d ubeddel deg tenbaḍt n uwanak; anida aneɣlaf amenzu Ahmed Ouyahia, yettwakkes yuɣal-d deg umkan-is Noureddine Bedoui. Adgud ur yefriḥ ara swaya yessudes-d tikliwin timelwayin, dakken amennuɣ mazal yettkemmil.

Tasebḥit n wass-a ffɣen-d yiselmaden n yal aswir n waɣir n Bgayet mgal tasertit n wanak, i d-yeffɣen s uberreḥ mgal lebɣi n ugdud, deffir n tekliwin timelwayin i yeḍran deg waṭas n lwilayat n tmurt deg wussan yezrin. Daɣen ilmend n uwexxer n mass  Butefliqa i tefranin tiselwayin ara yilin ass n 18 deg yebrir i d-iteddun.

Iselmaden n tenmehla n usedwel n Bgayet, ffɣen-d ɣer yiberdan ssuddsen-d tikli tamelwayt mgal tawaɣit-a i yeḍran deg tmurt. Iswi amatu seg tikli-ya d asebgen n lɣiḍ ɣef rray i yefka Butefliqa. Daɣen taserti n udabu mgal lebɣi n uɣref. Syin d tasummelt ɣef uqmaḍ n uneɣlaf amenzu Noureddine Bedoui i tlelli n uɣref, ɣef tikliwin akked lxetyar anwa ara yilin d aɣella fell-as, syin addad deg wacu tella tmurt s umata.

Tikli-ya teḍra deg tlemmast n lawilaya n Bgayet, sdat n tenmehla n usedwel, tekkin deg-s iselmaden acku ẓran, yerna umnen belli ilaq ad d-yili ubeddel n waddad n  tmurt seg uẓar-is, mačči d awexxer n tefranin, neɣ abeddel n yineɣlafen. Tameskant-a, ad d-tili d tameskant tasertant mgal adabu amesbaṭli yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am: « Ulac, ulac, ulac ssmaḥ, ulac ». » Bouteflika Buleḥnak Lezzayer, mačči n yemma-k”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

D lwajeb asirem ad d-yili, deg wulawen ad d-yefti, ɣas akken lwaεed iteqqes. Abrid n umennuɣ ɣef tlelli n ugdud seg leḥkem amesbaṭli mazal ɣezzif, ɣas akken yeččur d uguren. Maca d lwajeb fell-aɣ merra ad t-neḍfer.

Amaziɣ Ilelli

 

A propos de l'auteur

Amaziɣ Illeli