Politique Une

Tifranin: Agdud mgal tikkin tis 5 n Butefliqa

Marche à Bgayet
Ecrit par Amaziɣ Illeli

Ilmend n tikkin n uselway n tigduda mass Abdelaziz Bouteflika i tikkelt tis semmus deg tefranin tiselwayin ara yilin ass n 18 deg yebrir i d-iteddun . Imezdaɣ n waas n lwilayat n tmur, ffɣen-d ɣer yiberdan ssuddsen-d tikliwin timelwiyin mgal tawaɣit-a i yeran deg tmurt. Iswi amatu seg tikliwin-a d asebgen n lɣiḍ ɣef tikkin n uselway mass Butefliqa deg tefranin tiselwayin i tikkelt tis 5. Daɣen taserti n udabu mgal lebɣi n uɣref. Daɣen d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikliwin-a ḍrant deg waṭas n lwilayat n tmurt « Bgayet, Jijel, Tizi Wezzu, Tubiret, Sṭif, Qsenṭina, Galma, Wehran, Lezzayer… ». Tekkint deg tekliwin-a tgejda n umussu asertan, acku ẓran, yerna umnen belli ilaq ad d-yili ubeddel deg tmurt. Aɣref yumen belli ma yella yessusem ɣef uzref-is, adabu amesbaṭli am wa, d awezɣi ad as-t-id-yefk. Yeffeɣ-d uɣref ɣer yiberdan s tikliwin timelwayin mgal adabu amesbaṭli. Ɣas akken yella-d unekcum n yimsulta deg kra n tamiwin n tmurt. Maca yella-d ukemmel n tikliwin, imi d win i d lsas n uqeεεed n tmurt-nneɣ.

Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is, yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05 ». « Ulac, ulac, ulac ssmaḥ, ulac ».«  Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Deg Lezzayer tamanaɣt ɣas akken yella-d uqmaḍ sɣur yimsulṭa deg ubrid yettawin ɣer Lmuradiya. Maca wid yekkin kemlen tikli alammi wwḍen ɣer din. Sdat n teɣremt n uwanak , yella-d yiwen n unejmuε d ameqqran. Imsuddsen n  tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Nacer AKOUCHE 

A propos de l'auteur

Amaziɣ Illeli