Kabylie Tamazight

Tifranin: Bgayet i tikkelt-nniḍen mgal tasertit n uwanak

Ecrit par Amaziɣ Illeli

Deffir n tẓalit n wass-a yeffeɣ-d ugdud ilelli. Iffuden ad d-tseggem tmurt. Ad tuɣal, ad tecbu timura n ddunit. Tikkelt-a mačči kan mgal tikkin tis 5 maca asutur yugar waya; agdud isutur asbed-d n tigduda tis snat. Agdud yeggul ur yeḥnit ma mazal yedder awanak ad yettwabeddel seg uẓar. Itikkelt-nniḍen agdud issuddes-d tikli tamelwayt mgal tasertit n wanak deg yal taɣult, ladɣa deffir n wayen i d-iberreḥ n uɣlif amezwaru. Daɣen Ilmend n tikkin n uselway n tigduda Abdelaziz Bouteflika i tikkelt tis semmus.

Imezdaɣ n lawilaya n Bgayet ssuddsen-d yiwet n tikli tamelwit i yeḍran tameddit-a, deffir n tẓalit n Ǧamuεa, deg tlemmast n waɣir n Bgayet, tikli tebda seg uxxam n yidles ɣer Lexmis. Iswi n tikli-ya d asebgen n lɣiḍ ɣef uberreḥ n wanak mgal lebɣi n ugdud, deffir n tekliwin yeḍran deg wussan yezrin, daɣen tikkin n uselway amuḍin ur d-nban, ugar n 5 n yiseggasen i tikkelt tis semmus, daɣen d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, daɣen liḥala deg wacu tella tmurt s umata. Tikli-ya ad tili daɣen d tajmilt i wid yefkan tudert-nsen iwakken ad d-yidir mmi-s Uzzayri d ilelli ilebda, am wakken ad tili d asnemmer i kra win iqeddcen ɣef tlelli, tamagit, tumast…

Tekkint deg tikli-ya, tgejda n umussu asertan, acku ẓran, yerna umnen s ubeddel. Imi d win i d lsas n uqeεεed n tmurt-nneɣ. Tameskant-a, ad d-tili d tameskant tasertant, imi tilelli n ugdud akked temεic-it mazal ur d-tuɣal ara d tamεict n umdan ilelli deg wakal-is. Deg tikli-ya tekkin deg-s ugar n 60000 n yimdanen, imekkiyen deg tikli-ya ssawalen s kra n tmenna, am : « Ala, ala, ala i usebded tis 05 ». « Ulac, ulac, ulac ssmaḥ, ulac ». » Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu-ya ». « Adabu amesbaṭli ». « Naεya seg yiɣeblan, nebɣa lxedma ». Imsuddsen n tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, maca- d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid ad t-inebḍen. Win umi iruḥ yidles-is, d yiles-is neɣ yettu aẓar-is, ad yeggri deg tatut, ad yezdel fell-as ddel d lbaṭel.

Amaziɣ Ilelli

A propos de l'auteur

Amaziɣ Illeli