Kabylie Tamazight Une

Tifranin : Bgayet mgal tikkin tis 5 n Butefliqa

Marche à Bgayet
Ecrit par Amaziɣ Illeli

Deg wussan yezrin, ḍrant tekliwin timelwiyin deg waṭas n lwilayat n tmurt, mgal tikkin n uselway n tigduda mass Abdelaziz Bouteflika i tikkelt tis semmus. Ass-a imezdaɣ n tɣiwanin-a “ Amizur, Tici, Bakaru” ffɣen-d ɣer yiberdan ssuddsen-d tikliwin timelwiyin ssuturen abeddel n unagraw aserti n tmurt. Am wakken daɣen ttmeğğiden s uṭixer n uwanak. Tikliwin-a ḍrant ass-a deg ubrid aɣelnaw N° 09 ɣef tis 06h00 n tsebḥit. Iswi n tikli-ya d asebgen n lɣiḍ ɣef tikkin n uselway ur d-nban ara ugar n 5 n yiseggasen yerna wid iḥekmen ttmeslayen s yisem-is; belli d aɣref i yebɣan tikkin n Butefliqa i tikkelt tis semmus, daɣen d tasummelt « dénonciation » ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, daɣen liḥala deg wacu tella tmurt s umata.

Tikliwin-a timelwayin d azamul n uɣref i ttnaḍaḥen ɣef tlelli-yis, ad tili daɣen d tajmilt i wid yefkan tudert-nsen iwakken ad d-yidir mmi-s Uzzayri d ilelli ilebda, am wakken ad tili d asnemmer i kra win iqeddcen ɣef tlelli, tamagit, tumast… Tekkint deg tikli-ya, tgejda n umussu asertan, acku ẓran, yerna umnen s ubeddel. Imi d win i d lsas n uqeεεed n tmurt-nneɣ. Tameskant-a, ad d-tili d tameskant tasertant akked tmeskant tadelsant, imi tilelli n ugdud akked temεic-it mazal ur d-tuɣal ara d tamεict n umdan ilelli deg wakal-is. Deg tekliwin-a kkin deg-s aṭas n yimdanen, imekkiyen deg tikli-ya ssawalen s kra n tmenna, am : « Ala, ala, ala i usebded tis 05 ». « Ulac, ulac, ulac ssmaḥ ulac ».«  Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu-ya ». « Adabu amesbaṭli ». « Ḥebset tamḥeqranit ». Yella-d yiwen n unejmuε d ameqqran. Imsuddsen n tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam.

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas akken yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ.

Nacer AKOUCHE

A propos de l'auteur

Amaziɣ Illeli