Kabylie Tamazight

Tifranin: imezdaɣ n tmurt, mgal tasertit n wanak.

Ecrit par Hichem B

Ass-a ffɣen-d yimezdaɣ n tmurt mgal tasertit n wanak, i d-yeffɣen s uberreḥ mgal lebɣi n ugdud, deffir n tekliwin timelwayin i yeḍran deg waṭas n lwilayat n tmurt deg wussan yezrin. Daɣen ilmend n tikkin n uselway n tigduda Butefliqa i tikkelt tis semmus deg tefranin tiselwayin ara yilin ass n 18 deg yebrir i d-iteddun.

Imezdaɣ n waṭas n waɣiren n tmurt, ffɣen-d ɣer yiberdan ssuddsen-d tikliwin timelwayin mgal tawaɣit-a i yeḍran deg tmurt. Iswi agejdan deffir n tekliwin-a d asbed n tigduda tis snat, daɣen d asebgen n lɣiḍ ɣef tikkin n Butefliqa deg tefranin tiselwayin i tikkelt tis 5, akked taserti n udabu mgal lebɣi n uɣref. Syin d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikliwin-a ḍrant deg tlemmast n waṭas n waɣiren n tmurt, tekkin deg-s tgejda n umussu asertan acku ẓran, yerna umnen belli ilaq ad d-yili ubeddel n waddad n tmurt seg uẓar-is, mačči ɣef tikkin n Butefliqa kan deg tefranin. Imezdaɣ n tmurt am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbaṭli am wa, d awezɣi ad asen-t-id-yefk. Ffɣen-d ɣer yiberdan ssuturen ad d-tili tigduda tis snat. Agdud ur yeqbil ara s udabu amesbaṭli i yeṭṭfen tisura n leḥkem seg 1962 ar ass-a.

Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is, yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05 ». « Ulac, ulac, ulac ssmaḥ, ulac ». » Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Imsuddsen n tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud. Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d isegral, maca d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Amaziɣ Illeli

A propos de l'auteur

Hichem B