Politique Tamazight

Tifranin: Tasdawit n Bgayet mgal tasertit n wanak

Ecrit par Amaziɣ Illeli

Tasebit n wass-a ffɣen-d yinelmaden d yiselmaden n tesdawit n Bgayet mgal tasertit n wanak, i d-yeffɣen s uberre mgal lebɣi n ugdud, deffir n tekliwin timelwayin i yeran deg waas n lwilayat n tmurt deg wussan yezrin. Daɣen ilmend n tikkin n uselway n tigduda Butefliqa i tikkelt tis semmus deg tefranin tiselwayin ara yilin ass n 18 deg yebrir i d-iteddun.

Inelmaden d yiselmaden n tesdawit n Bgayet, ffɣen-d ɣer yiberdan ssuddsen-d tikli tamelwayt mgal tawaɣit-a i yeran deg tmurt. Iswi amatu seg tikli-ya d asebgen n lɣiḍ ɣef tikkin n Butefliqa deg tefranin tiselwayin i tikkelt tis 5. Daɣen taserti n udabu mgal lebɣi n uɣref. Daɣen d tasummelt ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, syin addad deg wacu tella tmurt s umata.

Tikli-ya teḍra deg tlemmast n lawilaya n Bgayet, tekkin deg-s tgejda n umussu asertan, ama d inelmaden neɣ d iselmaden acku ẓran, yerna umnen belli ilaq ad d-yili ubeddel n waddad n tmurt seg uar-is, mačči ɣef tikkin n Butefliqa deg tefranin. Inelmaden n Bgayet am yal tikkelt ttilin mgal tasertit n uwanak, imi umen belli ma yella sussmen ɣef yizerfan-nsen, adabu amesbali am wa, d awezɣi ad asen-t-id-yefk. Ffɣen-d ɣer ubrid s tikli tamelwayt mgal adabu amesbali.

Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is seg 1962 ar ass-a, yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05« . « Ulac, ulac, ulac ssma, ulac ». » Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbali ». « Ḥebset tameqranit ».

Sdat n lawilaya yella-d yiwen n unejmuε d ameqqran. Imsuddsen n tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d, ad d-tili tlelli n ugdud akked tella deg ugraw n Ssumam. Abrid n umennuɣ ɣef tlelli n ugdud seg lekem amesbali mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

A. I

A propos de l'auteur

Amaziɣ Illeli