Tamazight

Tifranin : Yemma Guraya, mgal adabu

Ecrit par Amaziɣ Illeli

Tilawin n waɣir n Bgayet, sfugglent tafaska-nsent, s tikli tamelwayt mgal tasertit n uwanek, deg yal taɣult. Tafaska n tikkelt-a txulef tiyaḍ, imi mačči s umerreḥ d tmeɣra n ccḍiḥ. Maca s tuffɣa ɣer ubrid, tettnadi ɣef yizerfan ad as-yettwakksen i nettat akked warraw-is sɣur wid yeṭṭfen tisura n leḥkem seg 1962 ar ass-a. Assa ugar n 4000 n tlawin d twaculin-nsent i yekkin deg tikli tamelwayt, i yeḍran deg tlemmast n waɣir n Bgayet. Tameṭṭut tazzayrit terra-d i tiɣri n Wember 1954. Tura terra-d i tiɣri n warraw-is, i tettwali imal-nsen ur d-iban, sani i teddu. Tikli teḍra tameddit n wass, tebda seg uxxam n yidles Ṭawes Ɛamruc “ Bgayet”, alamma d Lexmis.

At udabu ɣas akken ẓran belli tuget, neɣ azgen ameqqran n Yizzayriyen, ur bɣin ara ad itekki Butefliqa deg tefranin-a itikkelt tis semmus. Tiqit yeččuren lkas, d iberriḥen n yimḍebren imenza n yikabaren n uwanek s tikkin n Butefliqa deg tefranin tiselwayin ara yilin ass n 18 deg yebrir i d-iteddun. Tawaɣit-nniḍen aberreḥ n yimḍebren n yikabaren n udabu am Aḥmed Uyaḥya d Muεad Bucwareb akked Ɛamar Ɣul deg tiliẓri taɣelnawt, akked tiliẓriyat tusligin, deg uberreḥ-a ttmeslayen s yisem n uɣref, belli d netta i d-yessutren tikkin n Butefliqa i tikkelt tis semmus deg tefranin-a. Aɣref yettwali deffir n uberreḥ-a belli iqerra n yikabaren-a stehzayen yes-s. Syin tella-d tuffɣa n uɣref ɣer yiberdan s tikliwin timelwayin, imi yettwali belli awanak ur d-yecliε ara s uɣref, ixeddem ayen yeffɣen fell-as netta, akked wid yeddan yid-s, wama aɣref d zyada. Deffir n usras n warrat n tikkin n Butefliqa deg usqamu amendaw. Llant-d aṭas n tekliwin timelwayin deg tuget n waɣiren n tmurt. Anda agdud yettmeğğid s temḥeqranit i d-yellan sɣur udabu amesbaṭli.

Tikliwin-a ḍrant mačči kan deg Bgayet, maca deg waṭas n lwilayat n tmurt. Tekkint deg tekliwin-a tgejda n umussu asertan, acku ẓran, yerna umnen belli ilaq ad d-yili ubeddel deg tmurt. Aɣref yumen belli ma yella yessusem ɣef uzref-is, adabu amesbaṭli am wa, d awezɣi ad as-t-id-yefk. Yeffeɣ-d uɣref ɣer yiberdan s tikliwin timelwayin mgal adabu amesbaṭli. Maca yella-d ukemmel n tikliwin, imi d win i d lsas n uqeεεed n tmurt-nneɣ. Tameskant-a, ad d-tili d tameskant tasertant mgal adabu amhersan yeṭṭfen tisura n leḥkem deg ufus-is, seg 1962 ar ass-a. Yessaweḍ alammi yečča azref n ugdud, yerna yettmeslay s yisem-is i tmura n berra, belli d netta i yebɣan tikkin n unefran-nsen. Aɣref yeεya seg tsertit tujḥift n uwanak, imi tilelli-yis tettwaqmeḍ, ma yella d tamεict-is mazal ur d-tuɣal ara d tamεict n umdan ilelli. Imekkiyen deg tikli-ya ssawalen s kra n tmenna, am : « Ma tebɣam Lgira ur nugad ara”.” Ala, ala, ala i usebded tis 05 ». « Ulac, ulac, ulac ssmaḥ, ulac ».«  Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbaṭli ». « Ḥebset tamḥeqranit ».

Abrid n umennuɣ ɣef tlelli n ugdud seg leḥkem amesbaṭli mazal ɣezzifit, ɣas yeččur d uguren n yisegral, meεna d lwajeb fell-aɣ merra ad neḍfer abrid-a n umennuɣ, acku agdud yebran i umennuɣ-is ur yettidir ara deg liser, ad yeqqim d akli n wid it-inebḍen. Win i wumi iruḥ nnif, ad yidir d akli ilebda, ad d-yezdel fell-as ddel d lbaṭel.

Amaziɣ Ilelli

A propos de l'auteur

Amaziɣ Illeli