Kabylie Tamazight

Xerraṭa: ma mazal nella, d awezɣi ad neqbel tis 5

Ecrit par Amaziɣ Illeli

I tikkelt tis snat tamdint n umezruy. Tamdint n yirgazen wid yefkan tudert-nsen iwakken ad idiren warraw-nsen deg talwit d lehna. Ama d imezdaɣ n tɣiwant neɣ wid n tɣiwanin i d-yezzin, ffɣen-d ɣer ubrid ttmeğğiden mgal adabu amesbaṭli, yeččan izerfan n ugdud-is. Daɣen ttεeggiḍen mgal tawaɣit yeḍran deg tmurt; imi i d-yella utekki n uselway n tigduda Butefliqa i tikkelt tis semmus.

Imezdaɣ n tɣiwant n Xerraa ssuddsen-d yiwet n tikli tamelwit i yeran ass-a deg ubrid aɣelnaw N° 09 ɣef tis 09h00 n tsebit. Iswi n tikli-ya d asebgen n lɣiḍ ɣef tikkin n uselway amuḍin, ur d-nban ugar n 5 n yiseggasen, i tikkelt tis semmus, daɣen d tasummelt, ɣef uqmaḍ n udabu i tlelli n uɣref ɣef lxetyar anwa ara yilin d aɣella fell-as, daɣen liala deg wacu tella tmurt s umata. Tikli-ya ad tili daɣen d tajmilt i wid yefkan tudert-nsen iwakken ad d-yidir mmi-s Uzzayri d ilelli ilebda, am wakken ad tili d asnemmer i kra win iqeddcen ɣef tlelli, tamagit, tumast.Tekkint deg tikli-ya, tgejda n umussu asertan, acku ẓran, yerna umnen s ubeddel ilaq ad d-yili; imi d win i d lsas n uqeεεed n tmurt-nneɣ. Tameskant-a, ad d-tili d tameskant tasertant, imi tilelli n ugdud akked temεic-it mazal ur d-tuɣal ara d tamεict n umdan ilelli deg wakal-is. Deg tikli-ya tekkin deg-s ugar n 40000 n yimdanen. Imekkiyen deg tikli-ya ssawalen s kra n tmenna, am : « Ala, ala, ala i usebded tis 05« . « Ulac, ulac, ulac ssma, ulac ». » Bouteflika Ya Lmerruli ulac Lεuhda tis 5”. “Ad nerreẓ wala, ad neknu », « Neεya seg udabu amesbali ». « Tigduda tis snat ». Sdat n uxxam n tɣiwant, yella-d yiwen n unejmuε d ameqqran. Imsuddsen n tmeskant-a ṭṭfen awal, ssumlen-d tigawin xeddmen At udabu i tmurt deg yal taɣult. Sutren-d ad d-tili tigduda tis snat, ad d-tili tlelli n ugdud akked tella deg ugraw n Ssumam.

Agdud yumen belli abrid n umennuɣ ɣef tlelli mazal ɣezzifit, ɣas yeččur d uguren. Maca d lwajeb fell-as ad t-yefer, acku agdud yebran i umennuɣ-is. Ur yettidir ara deg liser, ad yeqqim d akli n wid ad t-inebḍen. Win i wumi iruḥ uzref-is yessusem fell-as, ad yezdel fell-as ddel d lbaṭel.

Amaziɣ Ilelli

A propos de l'auteur

Amaziɣ Illeli