Kabylie Tamazight Une

Yekkes fell-awen sser !

Ecrit par Amaziɣ Illeli

Deffir n wayen i yeḍran deg La Coupole deg Lezzayer tamanaɣt, anda i yettwakkes sser ɣef tmurt,  akked lɣaci yettidiren deg-s, timental n tukksa n sser d timeɣnest uεebbuḍ akked tiderɣelt ɣef tidet. Yaḍra wid i d-yusan ɣer din d imdanen neɣ d lɣaci ? Ccah iḥcayawent win iɣelqen amni “ Parlement” s snasel, ccah ikellex-iwen win d-yennan: “ Tamurt teqcef, iwweḍ lmus ɣer yiɣes”. Nnig n waya tasusmi n uselway n tmurt i yeqqimen d agugam ugar n 05 n yiseggasen, kra n win d-yusan ɣer tmurt skanayen-d tiwlafin n uselway iɣaben ɣef ugdud-is ugar n 4 n yiseggasen. Tteswirat i d-senɛaten n umdan-a “yemmuten/yeddren”. Deg umḍiq-nniḍen llan wid yeddmen lɣiḍa d ṭṭbel bdan ajewwaq d uleḥḥes, la yettɛeyyiḍ, la ssawalen akken ad yili “uzgen n umdan-a” d aselway i xemsa n yiseggasen-nniḍen, imi ɣef leḥsab-nsen ala takerrust-a i izemmren ad tessufeɣ Lezzayer seg ṭṭlam ɣer tafat, am akken i yettwakkes ṭṭlam-nni i yellan yakan deg 15 n yiseggasen.

Ussan i d-iteddun ad d-rnun ṭṭbel i yijewwaqen-a, eǧǧ ad ceḍḥen ungifen, wid umi teffeɣ tmurt-a akka, ma d wid i yesɛan leɛqel la qqaren-asen wid yellan deg uwanak: “ Nesεa ipulisen d yijaḍarmyen d nekkni i zemren ad yeqqimen deg Lmuradiya alamma tenger ddunit”. Gar wid yumnen belli Lezzayer d lawan ad tezger ɣer tigduda tis snat d massa Zoubida Assoul i yettnaḍaḥen mgal timḥeqranit yellan, tettnaɣ mgal wid itefren iṭij s uɣerbal, deg kra n tadiwenniyin as-yemmuggen tmeslay-d ɣef ugdud azzayri nenna-d: “ Nekk la ttwaliɣ belli yella usirem, agdud azzayri ur iɣfil ara, yebda la yettnaḍaḥ. Ur ttment ara ma nnan-d belli agdud ur yaεlim skra, agdud azzayri iwala kulec, yeẓra yal tadyant, atan yebda la ixeddem tikliwin. Agdud ur yeqbil ara tamεict deg wacu yettidir tura, lukan ad tekksem fell-as lḥers ad as-txedmem, ad d-ffɣen merra Yizzayriyen deg yal lwilay n tmurt ɣer yiberdan, yerna ad d-tili tikli tamelwayt akken iwata lḥal, ad d-yini aql-aɣ mgal Lεuhda tis 5, imi agdud mačči yekreh aselway. Maca imal n tmurt i yellan deg llaεb. Nekkni ad d-netteffaɣ ɣer ubrid deg tikliwin timelwayin, ad d-nini belli aql-aɣ amgal Lεuhda tis 5, nettnadi abeddel asertan anda zemren ad tekkin deg-s merra Yizzayriyen. Deg wayen nedda nwali belli agdud Azzayri yeḥsa s kulec, yerna yella, umazal yettili mgal leḥkem-a amesbaṭli”.

Nekkni nettnadi tifrart i wuguren deg wacu yettidir ugdud, mačči nettnadi akursi n leḥkem.

Anwa ara akem-d-iselken a Lezzayer ?

Mazal yettkemmil…

N. A

 

A propos de l'auteur

Amaziɣ Illeli